Dagen markerer hendinga som er omtala i Lukas-evangeliet 1. kapittel, vers 26-56, då erkeengelen Gabriel kom til jomfru Maria med bodskap om Jesu fødsel. Opphavleg var denne dagen feira 25. mars, som er ni månadar før jul. Dagen feirast hos oss på den sundagen som kjem nærmast denne datoen, og i 2022 er dette den 27. mars.
Maria bodskapsdag er ein festdag midt i fastetida. Feiringa av dagen starta allereie rundt år 350, og rundt år 700 vart den ein fast festdag 25. mars.
I Ørsta kyrkje er det lange tradisjonar for å late att alterskapet denne dagen. Alterskapet står for det meste opent elles i året, men akkurat på Maria bodskapsdag passar det bra å syne fram utsida av vengedørene. Her er det nemleg måla eit bilete av jomfru Maria då ho tok imot Den Heilage Ande.
Maria og dua på eine vengedøra til alterskapet i Ørsta kyrkje, som er late att på Maria bodskapsdag. Skapet er også lukka i adventstida og opnast under juleotta første juledag klokka 7.
Alterskapet i Ørsta kyrkje kan for øvrig vere verdt ei vitjing i seg sjølv. Det tilhøyrer den såkalla Lekagruppa, beståande av ei knippe alterskap som truleg kjem frå same verkstad i Nederland. «Det nær 600 år gamle alterskapet er ein av dei verkeleg store kunstskattane i Ørsta kommune. Skapet vart truleg laga i nordre del av Nederland i starten på 1500-talet, og har stått i Ørsta sidan den gamle kyrkja var i bruk», skreiv lokalavisa Møre-Nytt om skapet, då det skulle til konservering i 2011.
Alterskapet i Ørsta kyrkje, med dørene opne. Biletet er frå før konserveringa i 2011. Foto: Møre-Nytt
Innsida av alterskapet i Ørsta kyrkje.