Songen rungar frå kortrappa i Fjell kyrkje: «Det er så herleg å vere til!» Ungane kan teksten godt no. Nokre står stille i kortrappa medan dei syng, andre dansar litt i takt med musikken, medan dei minste surrar litt rundt på det vakre, raude teppet. Foreldra følgjer dei med smilande ansikt. Det er god stemning i flokken!
Med andre ord: ein heilt vanleg øving i Fjell barnekor. Likevel ein spesiell tysdag, for middagen stod på bordet då familiane kom til kyrkja. Pølser og prat rundt bordet før korøving ser alt ut til å bli ein tradisjon etter første forsøk.
Barnekoret er i vekst, det gode ryktet spreier seg, og familiar finn saman og kjenner at dette er ei kyrkje for alle!