Ein annan ting han kan gjera er å finna ein song som begynner med siste bokstav i førre song.
På føremiddagstreffet rett før påske var det Påska i ord og tonar som var temaet hans. Det førte med seg at det blei ein god del song i føredraget hans. Sjølv spela han til songane på pianoet. Ein av songane han trekte fram var Jakob Sande sin «Salme». Den stod i same diktsamlinga der vi òg finn dikt som «Etter ein rangel» (I morgon skal eg … , trur eg). I «Salme» syng vi: Du som låg i natti seine Sorgtung vanvørd og aleine Skjelvande på såre kne Du som skåli trufast tømde medan alle dine rømde Stridsmann frå Getsemane.
Bestemora til Lars Arne Vik (LAV) dreiv misjonsforeining for Misjonssambandet, og på veggen hadde ho m.a. eit bilete av Trygve Bjerkreim. Då LAV i si tid jobba i ei russeavis skreiv han til Bjerkreim og spurde om han kunne få eit dikt av han, og det fekk han. På føremiddagstreffet stansa vi ved ein av songane hans: Takk at du tok mine byrder, eit høgfjell av skuld og av skam. Du bar det på skuldrene dine, du skuldlause, sonoffer-lam.
LAV hadde også teke med ein song av Bjørn Eidsvåg, ein song med tittelen «Til alle tider»: En tåre renner fra ikonet, en mager mann med tornekrone, grepet ser jeg ned, min tro, mitt håp, min fred, jeg ser hva jeg har gjort og legger kronen bort, straffen lå på deg, skammen bærer jeg.
Det vart også tid til fleire andre songar. Et mitt brød, drikk min kalk, kom til meg og sult ikke lenger var ein av dei. Ein annan var «Klapp alle hender i glede» der omkvedet lyder: Jesus sto opp igjen, han er her, halleluja!
Olai Otterå