Eit av borda bak i lokalet var fylt med lefser, lappar og andre ting ein kunne kjøpa. Tombola var det òg bakarst i lokalet, og fleire av ungane prøvde lukka der under vårmarknaden.
Framme i lokalet var det ein kafékrok der ein kunne få kjøpa kaffi og diverse kaker og bollar, og dei fleste var innom her og fekk seg noko å bita i. Men også denne gongen var salet av årar viktig, for ein god del av inntekta kjem frå dette salet. Det var to omgangar med åresal, og som vanleg var det nokon som var meir heldige enn andre når det galdt å kapra til seg gevinstar.
Mellom dei to åresala fekk diakon Torunn N. Utvær sleppa til med nokre velvalde ord til oppbygging. På slutten av vårmarknaden var det trekking av mange gevinstar på alle dei 95 loddbøkene som var selde.
Det viste seg at loddbøkene, åresala og kaféen til saman samla inn 65.000 kr. Desse pengane skal gå til diverse utstyr til kyrkjelydshuset, kanskje først og fremst utanfor huset, utan at heilt konkrete ting er nemnt. Og blir det pengar til overs vil dei gå til barne- og ungdomsarbeidet i kyrkjelyden.
For pengane som vart samla inn på vårmarknaden i fjor var det kjøpt inn kvite lamellgardiner. Dei vart hengde opp i vindaugo i kyrkjelydshuset dagen før vårmarknaden i år.
Olai Otterå