Konfirmantane vil gå frå dør til dør – for dei som ikkje har reint vatn i springen. Bak frå venstre ser vi Lucas Reksten Auning, Eivind Snipsøyr Nossen og Amund Blomvik Grande. Fremst: Emil Eidskrem Urvik, Herman Hide Vedde, Nickolai Vestre Fiskerstrand og Benjamin Tafjord Helgesen.
Fasteaksjonen i år handlar om noko av det mest essensielle i livet - tilgang på reint vatn.
– Det er vanskeleg for oss å forestille oss eit liv utan rennande vatn i springen. Dessverre er ikkje dette ei selvfølge alle stader i verda, seier Ingvild Snipsøyr.
Diakonen i Sula sokn er glad for å sjå det store engasjementet kring Kirkens Nødhjelp sin årlege fasteaksjon, som i år er sett til tirsdag 19. mars.
– Ta godt imot ungdomane
– Fasteaksjonen gir konfirmantar og frivillige i kyrkjelyden ei muleghet til å gjere ein ekstra innsats for dei som ikkje har det like godt som oss, seier Snipsøyr. – Vi kan vere med på å gi håp i ein drope vatn for andre som før måtte gå fleire timar for å skaffe vatn til seg og familien.
Når konfirmantane våre brukar nokre timar på å gå frå dør til dør, er det altså med mål om at dei som i dag har lang veg til reint vatn skal få det lettare.
– Eg håper at alle som får besøk av ein bøssebærar denne dagen tek godt imot dei og støttar opp om dette viktige arbeidet.
Artikkelen er skriven av Odd Solnørdal og den er henta frå Sulaposten.
Tusen takk for godt samarbeid og fokus på ein viktig sak!
