Den aller fyrste jula var ikkje ein tradisjon. Alt hende for fyrste gong. Alt vart snudd opp ned, og folk måtte reise langt vekk for å skrive seg inn i manntal. Det var ei tid med uro, stress og usikkerheit.
Inn i denne uroa steig Gud ned og kom til oss med bodskap om fred, glede og frelse!
Det som gjorde at Jesu kome til verda vart år null i vår tidsrekning er at då vart heile tilværet sett i eit anna lys. Han kom for heile verda, alle folk. Han kom med fred og evig frelse.
Jula i år vert nok ein gong annleis enn vi ynskjer, men sjølve julebodskapen kan ikkje takast frå oss sjølv om rammene rundt høgtida vert endra. Eg vil utfordra deg til å lese sjølve juleevangeliet denne jula. Med di eiga røyst. Og så kan du be stille, eller høgt, for deg sjølv og for den verda vi lever i: at jula må kome med fred i hjarta og fred mellom oss.
Ei signa jul ynskjer eg dykk alle!
Ingvald Andersen Frøyen
Sokneprest i Førde, Holsen og Haukedalen