I sitt visitasforedrag understreka preses Olav sitt sterke møte med kyrkjelydane i den mest urbane delen av bispedømet.
- Tradisjonen er på plass. Dei tre kyrkjebygga (Bakke, Lademoen og Lade kyrkjer) har til saman med seg både historisk tyngde og moderne utforskartrang. Her er solide stabar, stor frivilligheit, gode rådsorgan og sterk organisasjon. Her er villige og engasjerte medarbeidarar og frivillige. Det er på ingen måte kyrkjelydar som byrjar på "scratch". Men solide og opne kyrkjer med stor mogelegheit for samhandling; både internt og eksternt, sa han i oppsummeringa si.
Preses i bispemøtet er også biskop og tilsynsmann for kyrkjelydane i Nidaros domprosti, mellom anna Bakklandet, Lade og Lademoen. I løpet av visitasen fekk han treffe tilsette, skuleungar, frivillige og politikarar og sjå lokalt kyrkjelydsliv, omsorgsarbeid og næringsliv i praksis. Han var også med på lanseringa av boka «Kirkeskipet - gudstjeneste på de minste barnas premisser».
Les meir om boklanseringa her.
- Eg har fått sjå kyrkjelydar som arbeidar målretta og utadretta. De er opptekne med kva for rolle de skal ha og de utforskar den i samspel med aktørar, institusjonar og partnarar kring dykk i lokalsamfunnet. Det gler meg, og eg vil seie: hald fram med det. Hald fram med å søkje samarbeidsrelasjonar i alle slags miljø. Gå ut til dei og lat opp kyrkja for dei. Det ligg opningar i det å vere eit sterkt og særskilt bygg midt i byen. Her vert så mange trådar samla. Tradisjon og framtid, ro og handling, stille røyster i varme rom, sa preses Olav etter visitasen i Lade, Bakklandet og Lademoen.