Johnsen har vore vikar i stillinga sidan 1. februar i år, og har i same periode hatt permisjon frå prestetenesta i domkyrkja. Frå november av blir ho fast tilsett som misjon- og kyrkjefagsrådgivar på bispedømekontoret. Dermed må Johnsen leggje frå seg alba og messehagel for denne gong.
- Eg har jobba lenge i same stilling og i same kyrkjelyd. Og eg må få seie at det har vore veldig fint, domkyrkja har vore ein stad eg har trivds.
- Men no følte eg at eg var klar for nye utfordringar. Det å få reise rundt og besøke kyrkjelydar i heile Møre bispedøme, både for å lære, hjelpe til der eg kan, og utvikle kyrkjelydsarbeidet, ser eg veldig fram til. Alt utviklingsarbeid i kyrkjelydane handlar om å nå fleire med evangeliet. Det er jo det prestegjerninga også handlar om. Og no får eg moglegheit til å jobbe med dette i heile bispedømet, slår Johnsen fast.
Johnsen var kapellan i Molde domkyrkje i ti år, og seinare sokneprest i åtte år, før ferda no gjekk til bispedømekontoret.
- Det har vore ei veldig kjekk tid i Molde domkyrkje, og no unner eg ein ny prest å vere del av ein fantastisk kyrkjelyd, seier Johnsen.