- Eg vart overraska og veldig glad når eg fekk beskjeden, fortel Domprost, Ragnhild Jepsen.
Domprost Ragnhild Jepsen kjem frå Ål i Hallingdal og brukar nynorsk som forkynnar og formidlar i ulike medium. Trønderlaget skriv at «Jepsen viser gjennom både skrift og tale at nynorsk er eit språk som naturleg kan brukast i alle samanhengar. Som domprost i Nidaros når Jepsen ut til eit stort publikum. Gjennom gudstenester i Nidarosdomen, anten fysisk, eller i fjernsynsskjermen og radio, er vi mange som har hatt gleda av å høyre Ragnhild Jepsen som liturg. Jepsen har ein nær og presis språkbruk, som blir lagt merke til. Ho viser at ord kan skape gode bilete for tilhøyrarane.»
- Eg er glad for grunngjevinga til Trønderlaget, som viser at arbeidet me gjer i kyrkja er viktig.
Trønderlaget skriv vidare «Sidan 2005 har ho vore andaktshaldar i NRK radio. Jepsen er også ein aktiv samfunnsdebattant. Ho skriv kronikkar i Adresseavisa og ho bidreg med artiklar i ulike menighetsblad og i Jul i Trøndelag.»
Flott pris
Og ho tykkjer det er moro å sjå kven som har fått prisen tidlegare.
- Det er mellom anna fleire kjente og dyktige forfattarar, som har fått prisen. Det er ein flott pris å få.
Jepsen har også hatt ulike verv i Noregs Mållag, og ho var sentral i 100-årsfeiringa av den første omsetjinga av bibelen til nynorsk.