For første gong skal kyrkja på Sula arrangere Mangfaldsgudsteneste, og det skjer på Indre Sula kyrkje 30. april. «Vi er glad og stolt over at soknerådet sa ja til dette», seier sokneprest Anders Barstad. Han seier vidare at «Vi skal feire mangfaldet i samfunnet, og vi skal stille spørsmålet: Er kyrkja for alle?»
Denne gongen set messa fokus på dei med LHBT+ identitet mellom oss. Vi får besøk av Kaja Haugstvedt og Robert Erstad Molvær, som representerer LBHT+ - rørsla på kvar sin måte. Saman med soknepresten skal dei ha ein samtale om korleis det er å kome til kyrkja, og ikkje vere heilt slik som samfunnet kallar A4. Dei deltek også i gudstenesta. Kaja som medliturg, medan Robert skal bidra musikalsk.
Vi håper at mangfaldsgudstenestene skal bli regelmessige, og at vi skal få feire mangfaldet i kyrkja, både i desse gudstenestene og elles i rikt monn i tida som kjem.
Soknepresten seier «Målet må vere at mangfaldsgudstenester skal gjere seg sjølv overflødige. Mangfaldet skal vere ein sjølvsagt ting i kyrkja, men enn så lenge trur eg desse gudstenestene er viktige.»
Han seier vidare: «Ei slik gudsteneste, med desse deltakarane, ville ofte bli kalla Regnbogemesse. Det er eit flott ord, også ønsker vi å markere at kyrkja er mangfaldig. Vi kjem til å invitere inn ulike menneske i framtida, som samfunnet ofte definerar utanfor det som er A4.»
GodKveld-gudstenestene i Indre Sula kyrkje finn stad om lag ein gong i månaden, og er ein annleis gudsteneste, med god musikk og litt alvor.
Pressemelding, Sulaposten veke 17 2023
